Главниот обвинител на Меѓународниот кривичен суд (МКС), Карим Кан е суспендиран од својата функција откако дисциплинската постапка за обвинувања за сексуална злоупотреба влезе во последна фаза, а неговата судбина сега ќе ја одлучат земјите-членки на судот.
Одлуката ја донесе извршниот комитет на управното тело на МКС, кој гласаше за упатување на случајот против Кан на посебна седница на 125-те земји-членки. Ова е невиден потег во историјата на судот со седиште во Хаг.
Според документ што го виде британскиот „Гардијан“, комитет составен од претставници на 21 земја-членка со квалификувано мнозинство одлучи дека Кан направил сериозно кршење на прописите во врска со обвинувањата за сексуална злоупотреба.
Во соопштението на управното тело на МКС, беше нагласено дека суспензијата „не е показател за конечниот исход од постапката“, но е јасно дека еден од највлијателните меѓународни обвинители се соочува со најтешката криза во својата кариера.
Аферата избувна во 2024 година кога службено лице на МКС го пријави Кан за наводно сексуално вознемирување и злоупотреба.
Според нејзините тврдења, помеѓу 2023 и 2024 година таа била подложена на принудно, неконсензуално сексуално однесување во текот на подолг временски период. Наводните инциденти, како што е наведено, се случиле за време на службени патувања, во хотелски соби, во канцеларијата на Кан во Хаг, но и во неговиот дом.
Речиси две години, овие обвинувања предизвикуваат потреси во Меѓународниот кривичен суд и го доведуваат во прашање кредибилитетот на институцијата што ги гони најсериозните воени злосторства и злосторства против човештвото.
Кан, истакнат британски адвокат кој е на чело на Обвинителството на МКС од 2021 година, постојано категорично ги отфрла сите обвинувања.
Неговите адвокати претходно изјавија дека тој „категорично негира“ дека вознемирувал или злоупотребувал кое било лице, дека ја злоупотребувал својата позиција или дека се однесувал на начин што може да се протолкува како принудно, експлоататорско или професионално несоодветно.
Додека постапката е во тек, Кан веќе привремено се повлече од водењето на обвинителството.