“Веќе неколку години наназад градот Штип, особено централното градско подрачје се гуши во сообраќајниот метеж.
Постојниот режим на сообраќај на улиците„Маршал Тито”, „Васил Главинов” и „Генерал Михајло Апостолски”, платениот паркинг и изградбата на двете платформи досега не дадоа никакви резултати за растоварување на сообраќајот.
Во програмата на кандидатот за градоначалник на Општина Штип, Благој Бочварски, предвидено е да се воспостави нов режим на сообраќај во централното градско подрачје дополнето со изградба на две катни гаражи, една во центарот на градот и една во населба Сењак.
Во најфрекфентната населба во општината, населба Сењак, ќе се реконструира крстосницата кај спојката на улиците Ср.фронт и Борис Крјгер, каде се планира и поплочување на тротоарите, а предвидено е и нова надземна катна гаража со зелено пазарче.
Исто така за решавање на овој проблем ќе изградиме и нова обиколница на потег населба Железничка, преку населба Пребег, месноста Крстот до Бања Кежовица. На овој начин се создава дирекна сообраќајна врска помеѓу населбите Сењак, Пребег и Ново село.
Предвидено е и сите улици во урбаните и месни заедници да добијат патокази.
Реализацијата на овој проект ќе овозможи растеретување и поголема безбедност на сите учесници во сообраќајот, заштеда на гориво, намалување на емисии на штетни гасови од возила како и подобрување на квалитетот на животната средина”, се вели во соопштението на СДСМ Штип.