На 27 Јануари Меѓународниот ден за сеќавање на Холокаустот, се потсетуваме на ужасот на војната кој однесе илјадници животи на припадници на заедници и групи кои беа различни од мнозинството.
За антисемитизмот, антициганизмот, расизмот и дискриминацијата по која било основа, нема место во современо демократско општество какво што треба да изградиме збогатени со сите наши различности.
-Никогаш да не се заборави геноцидот над еврејскиот народ и низ образованието да се пренесува и зачува споменот за милионските жртви.
Холокаустот е најголемото злосторство во современата историја на човештвото кога во логорите на смртта, за време на Втората светска војна, беа погубени над 6 милиони Евреи. Да се потсетиме и на 7.144 Евреи од Скопје, Битола, Штип кои во 1943 година беа депортирани и убиени во Треблинка – трагедија длабоко вкоренета во колективната меморија на нашиот народ.
Посветено работиме на едукација како темел за негување на колективната историска меморија за злото и за трајно сеќавање и почит кон жртвите. Наша обврска е со сите сили да се бориме против антисемитизмот и сите останати форми на кршење на човековите права, напиша на својот ФБ профил премиерот Оливер Спасовски.
-На денешен ден се сеќаваме на жртвите од Холокауст, на загубените животи, растурени семејства и горчливи искуства. Да не заборавиме каде можат да нѐ одведат предрасудите и омразата и да го зачуваме ова сеќавање како лекција за генерациите кои доаѓаат. Да продолжиме да градиме отворено и обединето општество за сите, порача лидерот на СДСМ Зоран Заев.