Во изминатите 24 часа во земјава се регистрирани 26 пожари на отворен простор, информира Центарот за управување со кризи (ЦУК).
Според податоците, ниту еден од пожарите во моментов не е активен. Еден пожар е ставен под контрола, додека преостанатите 25 се целосно изгаснати.
Под контрола останува пожарот на излезот од Крива Паланка, во близина на депонијата. Сите останати регистрирани пожари се локализирани и изгаснати.
Од ЦУК велат дека изгаснати се пожари во повеќе региони низ земјата.
Во Скопскиот Регион пожарникарите интервенирале во општините Аеродром, Сарај, Петровец, Карпош и Кисела Вода каде гореле дрва, ниска вегетација и ѓубре.
Изгаснати се пожарите и во Новаци, Прилеп, Ресен, Струга и Кичево каде гореле ниска вегетација, депонија и стрништа.
Од ЦУК велат дека изгаснати се и пожарите во Босилово, Струмица и Кочани, како и во Старо Нагоричане, Куманово, Гостивар, Теарце и Тетово.
И во овие делови најчесто се интервенирало на запалена ниска вегетација, стрништа, ѓубре и диви депонии, а во неколку случаи биле зафатени и патнички возила.