Ново истражување објавено во списанието „Сел Прес Блу“ укажува дека поголемиот внес на протеини не е секогаш подобар; за многу возрасни кои не се особено физички активни, понизок внес би можел да придонесе за поздраво стареење и потенцијално подолг живот.
По анализа на повеќе од 350 студии спроведени врз луѓе, глувци и други организми, научниците утврдиле дека намалувањето на протеините може да го подобри метаболизмот, да го промени начинот на кој клетките реагираат на хранливи материи, да ги намали оштетувањата на клетките и да го подобри нивното функционирање, објави 4news.mk Придобивките, сепак, зависат од возраста, здравствената состојба и нивото на физичка активност.
„Целосно е јасно дека протеините имаат позитивен ефект врз растот на мускулите и одговорот на организмот на вежбање кај физички активните лица“, изјави еден од авторите на студијата, Дадли Леминг од Универзитетот на Висконсин – Медисон. „Но, бидејќи повеќето луѓе живеат релативно седечки начин на живот, многумина веројатно внесуваат повеќе протеини отколку што навистина им се потребни, што најверојатно има негативни последици по здравјето.“
Неколку понови испитувања врз луѓе покажале дека понизок внес на протеини може да помогне во намалување на телесната тежина и масното ткиво, а истовремено да го подобри нивото на шеќер во крвта. Метаистражување исто така укажало дека прекумерниот внес на метионин, изолеуцин и валин — аминокиселини од кои се градат протеините — може да го зголеми ризикот од дебелина, воспаленија и други заболувања поврзани со стареењето.
Во исто време, други истражувања упатуваат дека поголем внес на протеини, особено во комбинација со редовно вежбање, може да им помогне на постарите лица да ја намалат телесната тежина и да го ублажат губењето мускулна маса поврзано со стареењето.