СДСМ поднесе кривична пријава против четворица директори и функционери, поради сомнежи за ненавремено и несоодветно постапување на институциите во случајот со загадената вода во Гостивар.
Од партијата обвинуваат дека повеќе од еден месец по избувнувањето на здравствената криза, сè уште нема одговорност за случувањата, ниту целосно решение за проблемот со водоснабдувањето.
На прес-конференција, членот на Извршниот одбор на СДСМ, Јон Фрчкоски, изјави дека станува збор за сериозна здравствена криза и обвини дека институциите задоцниле со реакцијата.
Според неговите тврдења, речиси 5.000 граѓани побарале медицинска помош, а надлежните институции не реагирале навреме на зголемениот број лица со здравствени тегоби.
Кривичната пријава е поднесена против министерот за здравство Сашко Клековски, директорката на Институтот за јавно здравје Марија Андоновска, директорот на Државниот санитарен и здравствен инспекторат Кирил Лазов и директорот на Центарот за јавно здравје Тетово Шпенди Амети.
Од СДСМ велат дека постојат сомнежи оти пријавените, во својство на службени и одговорни лица, не ги презеле навремено законските мерки за заштита на здравјето на граѓаните и спречување на последиците од загадувањето на водата.
Фрчкоски обвини и дека граѓаните не биле навремено информирани за состојбата со водата, како и дека доцнело прогласувањето на епидемијата.
„Нема да дозволиме ова да се заташка. Одговорните за здравствената катастрофа и загрозувањето на здравјето на граѓаните мора да сносат одговорност – политичка и кривична“, порача Фрчкоски.
Од СДСМ го повикаа Јавното обвинителство да постапи по кривичната пријава, да ги провери наводите и да ги утврди евентуалните пропусти и одговорност на надлежните институции.
Наводите изнесени на прес-конференцијата се ставови и обвинувања на СДСМ, а нивната основаност треба да ја утврдат надлежните институции.