Сириските власти се соочуваат со обвинувања дека со хеликоптери фрлиле буриња-бомби кои содржеле гас хлорин во предградие на Алепо. Во нападот, како што пренесува „Би-би-си“, повредени биле 80 лица.
Волонтери од службите за итна помош изјавиле дека луѓето имале тешкотии со дишењето по нападот на областа Сукари.
Засега извештаите за употребата на хлорин немаат независна и официјална потврда.
Истрагата на Обединетите нации минатиот месец излезе со заклучок дека сириската влада во најмалку два случаи користела хлорин. Сепак, властите во Дамаск досега ги отфрлија сите наводи и обвинувања дека користат хемиско оружје.
Нападот во Алепо, како што пишува „Би-би-си“, се случува во пресрет на средбата на лидерите на сириската опозиција во Лондон, на која треба да биде понуден нов транзиционен план за ставање крај на петгодишната граѓанска војна во Сирија.