Европската унија утре ќе отвори ново поглавје во преговорите за пристапување со Србија, за слободно движење на капиталот.
Одлуката за отворање на четвртото поглавје во преговорите со Србија беше договорена на состанокот на Комитетот на амбасадори постојани претставници во ЕУ (COREPER) и Работната група за проширување на ЕУ, што ќе биде отворена на меѓувладината конференција ЕУ-Србија утре попладне, на маргините на шефовите на дипломатијата ЕУ во Брисел, пренесува Бета. Во преговорите за членство во ЕУ, Србија досега отвори 17 од 35-те поглавја, од кои две се привремено затворени.
Оваа година, на крајот на јуни беше отворено само едно поглавје, на Десеттата меѓувладина конференција, а се работи за Поглавје 9 за финансиски услуги.
Инаку, Србија отвори четири поглавја за преговори во претходната година и шест во 2017 година.
Претставниците на српската влада претходно изразија незадоволство од отворањето на само едно поглавје затоа што веруваат дека Србија е исто така подготвена да отвори уште три поглавја: за слободно движење на работната сила, за транс-европски мрежи, за транспортна политика.
Извори во Брисел се на мислење дека, во овој момент, тешко може да се дојде до отворање на повеќе поглавја, со оглед на тоа што во телата на ЕУ се води темелна дебата за предлозите за промена на „методологијата“ на процесот на проширување на ЕУ, по барање на Франција и неколку други членки да се направи процесот на проширување на ЕУ поефективен и „поопиплив“ за граѓаните на земјите кандидати.
За процесот на проширување и тоа како да се продолжи по октомвриската одлука на лидерите на ЕУ да не се отворат преговори за пристапување со Скопје и Тирана и францускиот предлог, денеска беа разгледани во Брисел на неформална средба на министрите за надворешни работи на ЕУ со министрите за надворешни работи на Северна Македонија и Албанија, Никола Димитров Гент Чакај.
Работниот појадок во пресрет на Советот за надворешни работи на ЕУ го организираше грчкиот министер за надворешни работи, Никос Дендиас, а на него присуствуваше и комесарот за проширување на ЕУ, Оливер Вархељи, кој изјави дека Европската комисија се придржува кон своите препораки за започнување на пристапните преговори со Северна Македонија и Албанија напролет.