Мадона својот 68. роденден го прославила во селото Курамадес на грчкиот остров Крф, каде што за нејзината приватност биле преземени посебни безбедносни мерки, објавуваат грчките медиуми.
Поп-ѕвездата, заедно со семејството и пријателите, вечерала во традиционална таверна, каде што имало грчка музика и специјалитети. Групата пристигнала со црни комбиња во придружба на обезбедување, а во селото било распоредено и полициско присуство.
Според локални жители, од нив било побарано да ги затворат прозорците на куќите за да се обезбеди приватноста на пејачката.
Мадона вечерала во градината на ресторанот, а прославата била проследена со грчка музика и традиционално кршење чинии.
Таа претходно планирала да ја посети и црквата „Дева Марија“ во Курамадес, која била отворена специјално за неа. Сепак, поради големиот број луѓе кои се собрале во селото, посетата била откажана.
Неколку дена претходно Мадона престојувала и во Метеори, каде што пристигнала со хеликоптер од Крф во придружба на околу 12 лица. Таму го посетила манастирот Варлаам, кој бил отворен специјално за неа и нејзината придружба.
Во манастирот имала средба со игуменот Бенедикт, со кого, според сведоштво на монах, разговарала за духовни теми, побарала совет и се интересирала за бројаницата што ја држел во рака.