“Дами и господа, наши сограѓани, дојде и тој ден.
ДЕНОТ НА ЧИСТАТА ВИСТИНА…САМО ВИСТИНА.
Двајцата најмоќни, но и најхаризматични лидери конечно ќе ги вкрстат копјата пред телевизиските камери.
Првиот, лидер на владејачката СДСМ и Премиер,
Вториот, прв човек на најголемата опозициска партија, ВМРО-ДПМНЕ.
Зоран Заев, 44 години, економист, и прв најмлад градоначалник на Струмица.
Христијан Мицкоски, 41 година, професор, и најдобар дипломиран студент на машинскиот факултет за 2001 година
Толку ли беше тешко двајцата највлијателни политички фигури, Заев и Мицкоски да почнат да комуницираат, а сега и јавно да се соочат?
Ќе бидат ли предводници на еден нов, реален бран на политичко , но и цивилно помирување?
Зошто за Мицкоски, политиката на Заев и СДСМ е предавничка, а какво пак однесување треба да има Мицкоски, за да му покаже на Заев политичка конструктивност?
Ќе им бидат ли 120 секунди доволни за секој одговор, реплика, контрареплика, дискусија па можеби и кавга?
Ќе си фрлаат ли „отровни стрелички“ еден кон друг, или ќе ни демонстрираат ново политичко џентлменство во Македонија?
ТВ дуелот за Заев и неговиот тим претставува јавен и отворен судир на идеи и концепти на двете најголеми партии, а во таборот на Мицкоски се среќни што ќе може да се говори за загрозените слободи и права, како и изневерените очекувања од Владата.
Кој ја отвори Пандорината кутија, а кој е вистински флексибилен лидер?
Кој е автор на т.н. „македонско сценарио“, а кој остава можноста граѓаните во вториот круг од пркос и револт да бојкотираат?
Некој е на „терен“ , некој е пак во Брисел, но кој прашува – каде сме ние, граѓаните на оваа преубава земја?
Одговорите, пред 2 милионска публика ќе ги дадат токму тие – Зоран Заев и Христијан Мицкоски, во Само Вистина во Вторник, 26ти март, во ТВ ДУЕЛОТ НА ДЕЦЕНИЈАТА” – стои во најавната шпица на КАНАЛ 5.