Во пресрет на големиот празник со кој се чествува закрилникот и заштитник на градот Крива Паланка „Св. Јоаким Осоговски“ општина Крива Паланка организира богата културно-уметничка програма во која ќе може да уживаат граѓаните, но и бројните посетители. Дел од настаните се традиционални, а целта е да се задоволи вкусот на повеќето генерации и музички жанрови.
И годинава, по 14-ти пат градот под Осоговските планини ќе биде домаќин на Интернационалниот фоклорен фестивал “Св. Јоаким Осоговски 2018“. Љубителите на изворниот мелос ќе може да уживаат во препознатливиот звук и колоритна глетка на вештите играорци и музичари од повеќе земји. Ќе настапат домаќините како и културно-уметнички друштва од соседна Бугарија и Србија, Турција и Северен Кипар. Ќе може да ги погледнете на градскиот плоштад, а како и претходните години, учесниците на фестивалот ќе ги разубават и развеселат улиците со дефиле низ градот.
На 25-ти август со почеток од 20:30 часот на плоштадот „Карпошово востание“ ќе се одржи рок спектакалот „Џои фест 2018“ на кој како главни ѕвезди ќе настапат култниот бенд „Рибља чорба“. Пред бенд се македонската група „Студени нозе“, „Трансформерс бенд“ и „РГБ“
Во чест на Денот на рударите Гала претстава ќе се одржи на 27-ми вечерта на која екслузивен настап ќе има српската ѕвезда Јелена Томашевиќ.
Од локалната самоуправа упатуваат отворена покана до сите жители како и до гостите во градот да бидат дел од овие настани со кои заеднички ќе се одбележат големите празници по кои градот е препознатлив.
Настаните се под покровителство на локалната самоуправа со поддршка од Министерството за култура.