Денеска во посета на првата краварска фарма во земјава која што се гради преку одобрен проект за гринфилд инвестиција со пари од ИПАРД Програмата, беше министерот за земјоделство, шумарство и водостопанство, Љупчо Николовски.
Инвеститор е компанијата „Ти-Ми Инженеринг“, а вкупната инвестиција е во вредност од 28 милиони денари. Министерот Николовски се запозна со начинот на реализација на инвестицијата во оваа краварска фарма, која што е финансиски поддржана од ИПАРД Програмата.
“Министерството за земјоделство, шумарство и водостопанство – #МЗШВ, посветено работи на спроведување на Националната програма за рурален развој, и на поголема искористеност на парите од претпристапните ИПАРД фондови, кои се важни за модернизирање, развој и приближување на македонското кон европското земјоделство.
Со цел подобро да се искористат парите од ИПАРД Програмата, работиме на приближување на постапката за одобрување на финансиски средства од европските фондови до секој земјоделец и поедноставување на административните процедури за пријавување.” – потенцира Николовски.