Ни претстојат празници во кои голем дел заземаат богатите трпези што изобилуваат со јадења со висок процент на маснотии и шеќери.
Пред нас е нова година, па да ги искористиме новогодишните одлуки за подобрување на начинот на кој се грижиме за телото кое (сигурно веќе) ни покажува дека време е за промена.
Во опуштена празнична атмосфера сите ќе јадеме и пиеме малку повеќе, но на телото потоа ќе му треба будење и прочистување од тие вкусни задоволства.
За да ја вратите рамнотежата во вашето тело, придржувајте се до овие чекори и посветете се на поздрав начин на живот за да го одржите балансот на здравото тело и дух.
Како знаете дека на организмот му е потребна детоксикација?
Здравите животни навики се добредојдени во текот на целата година, но ако се опуштите за време на празниците, не очајувајте. Со правилна детоксикација можете да решите бројни симптоми: умор, недостаток на енергија, поспаност, главоболки, проблеми со варењето и кожата, пад на имунитетот, несоница…
Ова се сите симптоми што телото ви ги испраќа како сигнали дека му е потребна детоксикација.
Позитивни ефекти на детоксикацијата
Исфрлањето на токсините од организмот ќе ви помогне да го засилите имунитетот, да ја подобрите циркулацијата и да овозможи правилна работа на црниот дроб и на бубрезите.
Покрај физичките придобивки, со детоксикацијата воспоставуваме рамнотежа и меѓу телото и духот, ја смируваме внатрешноста и тоа влијае на подобрување на душевната состојба и намалување на нивото на стрес.
Како да ја спроведете детоксикацијата?
За правилна детоксикација на организмот не се потребни строги диети – доволно е да ги следите насоките за здрав начин на живот. Тоа вклучува внесување повеќе течности, најмногу вода, чаеви и природни сокови. Одбегнувајте кафе, алкохол, енергетски и газирани пијалоци.
Важно е да се истакне дека детоксикацијата не значи изгладнување или прескокнување оброци, туку баш спротивно.
Треба да јадете повеќе, но помали и полесни оброци во текот на денот, што вклучуваат повеќе свежо овошје и зеленчук, особено зелјести растенија и мешунки.
Не заборавајте на физичката активност – преку потење ќе ги исфрлите токсините насобрани во вашиот организам. Прошетка со забрзано темпо во траење од 30-40 минути е најмалку што може да направите за вашето тело.
Не ја заборавајте негата на кожата. Одморете ја од парфимираните гелови за туширање и млека за тело и изберете органски сапуни и природни пилинзи со кои ќе ја обновите кожата и ќе ја подготвите за промената што ќе ѝ се случи и од внатре.
За добро здравје, покрај здраво тело, потребен ни е и здрав и спокоен ум. Одвојте време за истегнување, длабоко дишење и медитација во денот, посветено само на тоа во мирен и хармоничен простор.