Македонската делегација составена од пратеници од четирите парламентарни партии го продолжува учеството во програмата Open World на Конгресот на Соединетите Американски Држави.
– Уште три значајни состаноци во американскиот Конгрес во Вашингтон со конгресмените Congresswoman Norma Torres, Joe Wilson и Robert Aderholt каде ја истакнав важноста на силната билатерална поддршка од САД, заедничкото партнерство во НАТО и стратешкиот дијалог. Особено задоволство ми беше средбата со конгресменот Адерхолт кој пред се е голем пријател на Македонија и долгогодишен познавач на Балканот со кого разговаравме за евроатлантската интеграција и американската поддршка за реформите. Исто така, побаравме вклученост на САД во процесот на поддршката на нашата европска перспектива сега кога е моментот на проширувањето, истакна пратеникот од СДСМ, Љупчо Николовски.
Тој потенцира дека особено значајна била средбата со конгресменката Норма Торес, поддржувач на демократијата, владеењето на правото и човековите права.
– Таа има силна улога во креирањето на програмите преку кои САД ги поддржуваат своите партнери, вклучително и Северна Македонија и земјите од Западен Балкан. Ми беше особена чест да присуствувам и на сесијата на Комитетот за надворешни работи во американскиот Конгрес. Присуството овде во Вашингтон, создавањето нови пријателства и контакти придонесува за јакнење на македонските позиции во светот, изјави Николовски.
– Со овие средби ја заокруживме посетата на Конгресот на САД. Имавме можност да разговараме и со шефот на кабинетот на сенаторката Susan Collins, најдолгогодишната републиканска сенаторка, со директорот на кабинетот на независниот сенатор Angus King, а ја посетивме и канцеларијата на демократската конгресменка Congresswoman Chellie Pingree во Портланд.
Без разлика дали станува збор за републиканци, демократи или независни сенатори, едно е заедничко – нивните канцеларии функционираат како вистински сервис за граѓаните. Достапноста, отвореноста и секојдневната комуникација со луѓето не се само политичка култура, туку и клучна причина за довербата што ја уживаат кај своите избирачи. Тоа е лекција која секоја демократија вреди да ја следи, подвлече Николовски.
Македонската делегација работната посета на САД ја продолжи во Портланд, во сојузната држава Мејн.
На Универзитетот на Јужен Мејн биле остварени состаноци со повеќе организации на лобисти, со Дека Далак – првата градоначалничка со сомалиско потекло во историјата на САД, како и со Џонатан Вејн, извршен директор на Комисијата за владина етика и изборни практики.
