Младинскиот културен центар за сите љубители на филмската уметност на 9 февруари организира пренос во живо од доделувањето на оскарите, информираат од Град Скопје.
Македонскиот документарен филм „Медена земја“ испиша историја како прв документарец со две номинации за оскар. „Медена земја“ на режисерите Тамара Котевска и Љубомир Стефанов е номиниран во две категории за најпрестижните филмски награди во светот: најдобар документарен филм и најдобар интернационален филм.
Ова е историски настан за македонската кинематографија. Првпат и во историјата на Оскарите се случува документарен филм да биде номиниран во две категории. Ремек делото од документарец кој во изминатава година освои неброени награди и признанија а главниот лик пчеларката Атиџе стана симбол за подигање на свесноста за природата и воопшто етиката и човечноста, се доближи до врвното светско филмско признание, соопшти Агенцијата за филм откако попладнево Американската филмска академија објави дека документарниот „Медена земја” е номиниран во двете категории во кои беше во потесен избор – за докуменрарец и за интернационален филм.
Тимот на „Медена земја” се огласи со соопштение на официјалната фејсбук-страница во кое се заблагодарува на Американската академија (AMPAS) за тоа што го вклучи филмот во трката за најпрестижната филмска награда на светот.
– Пред сѐ, би сакале да се заблагодариме на членовите на Американската академија (AMPAS) за тоа што го вклучи „Медена земја” во трката за најпрестижната филмска награда на светот. Преку жената која случајно ја сретнавме, пред светот се отвори приказна – алегорија на една глобална слика каде хуманото и натуралното се борат да преживеат. Атиџе и пчелите се прототип за новиот генетски материјал, кој треба да победи во битката на титаните, каде природата се бори со деструктивното. Среќни сме дека светските критичари и членовите на Академијата го препознаа крикот на планетата, кој ечи меѓу фрејмовите во филмот. Ја открија големината на човекот, преку големината на единката. Се разнишаа убедувањата дека радоста се крие во поседувањето. Уште еднаш, бескрајна благодарност до членовите на Акедемијата што филмот го нарекоа – материјал заслужен за Оскар, пишува на Фејсбук-страницата на „Медена земја”.