Необичен и загрижувачки случај вчеравечер ја вознемири јавноста во Скопје, откако во една населба бил пронајден и заловен волк кој, според првичните информации, бил чуван како домашно милениче.
Животното било затекнато со ремен и ланец, а на терен веднаш интервенирале надлежните служби. Волкот е безбедно преземен и префрлен на згрижување во скопската Зоолошка градина, каде ќе биде под надзор и соодветна грижа.
За случајот информираше градоначалникот на Кисела Вода, Орце Ѓорѓиевски, кој остро реагираше на, како што наведе, неодговорното однесување на поединци кои незаконски чуваат диви животни.
„Не станува збор само за несовесност, туку и за сериозен ризик по безбедноста на граѓаните и околината. Дивите животни не смеат да се третираат како миленичиња“, посочи Ѓорѓиевски во објава на социјалните мрежи.
Според информациите, веднаш биле известени и останатите институции задолжени за заштита на животните и јавната безбедност, а се очекува да биде покрената постапка за утврдување на одговорноста и околностите под кои животното било чувано.
Од Зоолошката градина засега не соопштуваат дополнителни детали за состојбата на волкот, но според првичните информации, животното ќе остане на згрижување додека не се донесе одлука за понатамошен третман.
Случајот повторно ја отвори дебатата за нелегалното чување егзотични и диви животни, како и за потребата од построги контроли и санкции. Надлежните апелираат граѓаните веднаш да пријавуваат вакви случаи, особено кога постои опасност по безбедноста на луѓето и самите животни.