Ако некогаш сте сакале да живеете на сончев остров, сега имате шанса, бидејќи Сардинија на луѓето им нуди 15.000 евра за селење.
Италијанскиот остров – втор по големина на Медитеранот, има песочни плажи, сино небо и тиркизна вода. Но, овој стровски рај има сè помала рурална популација, бидејќи локалните жители се преселуваат во странство поради работа.
Во борбата против овој егзодус, италијанската влада издвоила 45 милиони евра за преселување, доволно за покривање на 3.000 грантови.
Услови
Парите за преселба звучат премногу добро и има неколку услови.
За да ги исполнувате условите за парите, ќе мора да се преселите во општина во Сардинија со помалку од 3.000 жители.
Парите мора да се искористат за купување или реновирање на дом, при што парите не можат да надминат половина од вкупните трошоци за домот или реновирањето – а владата нема секогаш да ги предаде целосните 15.000 евра.
И последно, примателите мора да живеат на островот цело време и мора да се регистрираат за постојан престој во Сардинија во рок од 18 месеци по пристигнувањето.
Зошто Сардинија им нуди пари на луѓето за да се преселат таму?
Населението на Италија старее. Просечната возраст на Италијанците е 45,7 години, а оваа бројка ќе се зголеми на 50,7 до 2050 година.
Се предвидува вкупното население да се намали за речиси 20 проценти до 2070 година, од 59,55 милиони на 47,6 милиони во 2070 година.
Проблемот е особено сериозен во руралните средини на земјата – и места како Сардинија веќе чувствуваат проблеми.
Претседателот на Сардинија, Кристијан Солинас, вели дека оваа шема ќе ги охрабри младите да останат на Сардинија или да се преселат на островот.
„Благодарение на овие придонеси за купување куќи, Сардинија станува плодна почва за оние кои ќе се преселат таму или ќе одлучат да основаат семејство“, вели тој.
„Не може да има развој без вистинско подобрување на територијата, внатрешноста и најранливите области… Создадовме услови младите да решат да останат и да го развиваат економското ткиво на најкревките територии“.
Ако навистина се преселите на островот, можете да очекувате дека ќе останете таму долго време. Со повеќе од 500 луѓе постари од 100 години, Сардинија има една од највисоките концентрации на стогодишници во светот – приближно 33 на секои 100.000 жители.