Претседателот на ВМРО-ДПМНЕ, Христијан Мицкоски изјави дека опозицијата инсистира предвремените избори да се одржат на почетокот на април или крајот на мај следната година.
„Како опозиција ние бараме час поскоро предвремени избори. Изборите се можност Зоран Заев да провери дали навистина блеска. Опозицијата е подготвена веднаш“, рече Мицкоски.
Во однос на тоа дали е можен консензус за законот за Јавното Обвинителство, лидерот на опозициската партија е оптимист.
„Доколку постои честита намера можен е консензус за законот за ЈО“, рече Мицкоски, кој потоа додаде дека состаноците на работната група за оваа тема, изобилуваат со чувство за одмазда кон опозицијата. Мицкоски се надева и на компромисно решение за законот за попис, но и во однос на измените кои треба да следуваат во изборниот законик.
„Преговорите течат, ќе продолжат да течат по сите три основи. Се надевам на компромисно решение по сите точки“, рече Мицкоски.