Царинскиот терминал на Граничниот премин Деве Баир веќе неколку недели е затрупан во снег. Товарните возила при вршење на царинските формалности, наместо во терминалот се упатуваат на самата сообраќајна лента и се прави хаос во сообраќајот во период кога фреквенцијата во патничкиот промет е зголемена поради зимските одмори.
Оваа слика е веќе иста во изминативе 10-тина години. Надлежните институции дигаат раце и се молат да дојдат потопли денови и снегот да се стопи. Поради ваквиот несериозен однос на одговорните, државата секојдневно губи финансиски средства од тоа што терминалот е надвор од функција, бидејќи на секое возило при излез од терминалот му се пресметуваат давачки кои одат директно во касата на државата.
Покрај ова, се отежнува и работата на царинските службеници, граничните инспекции и останатите помошни служби.
Денес, на лице место да ја увидат фактичката состојба беа пратениците од СДСМ, Љупчо Николовски и Благој Бочварски.
Еве што напиша Николовски на својот фејсбук профил:
“Денес бевме во посета на Деве Баир. Првата слика на влез во државата е затворениот и празен терминал. Дел од државните органи немаат греење, хартија и никакви услови.
Промените започнуваат со тоа што институциите ќе ги имаат сите услови за работа.
И ќе работат во функција на граѓаните!”
