Мрежата на млади фармери во соработка со општина Свети Николе, а со финансиска поддршка од Министерството за земјоделство, шумарство и водостопанство, денеска на плоштадот „Илинден“ во Свети Николе, ја организираше манифестацијата „Ден на млад фармер“.
Со бројни штандови на земјоделски производители, претпријатија -дистрибутери на земјоделска механизација и млади фармери, каде што беше изложено дел од производството, како и новите машини и трактори, присутните имаа можност да се запознаат и остварат контакти со сите чинители кои остваруваат завидни резултати во аграрот.
Министерот за земјоделство Љупчо Николовски, во своето обраќање истакна, дека перспективите на земјоделците и на младите фармери се Фондовите за земјоделство на Европската унија, кои што во наредниот период ќе бидат многу подостапни и поедноставени.
„Секоја инвестиција во младите е инвестиција во иднината на оваа држава. Ми беше задоволство да присуствувам на денешниот саем за млади фармери во Свети Николе, кој се одржува под покровителство на Министерство за земјоделство, шумарство и водостопанство, во чии рамки го избравме најдобриот млад фармер и видов многу квалитетни производи. Продолжуваме да подржуваме вакви локални настани за развој и афирмација на земјоделството. Продолжуваме да носиме и мерки за помош и поддршка на младите. Со влезот во ЕУ за нив се отвора пазар од 500 милиони потрошувачи. Тоа значи стабилен пласман и повеќе приходи за сите наши земјоделци.“ – рече Николовски.
Мрежата на млади фармери ја организира оваа манифестација со цел да придонесе за анимирање на младите земјоделци преку јавни настапи кои пренесуваат успешни приказни, а со тоа да се зајакне свеста на младите за потребата од нивно останување во руралните средини, наследување и развивање на агро бизнисот.
Плакета за најдобар млад фармер Министерот Николовски му додели на Марио Петрев од село Амзабегово.