Поранешниот градоначалник на Кавадарци, Александар Панов е казнет со парична казна од 300 евра за поткуп на гласачи за време на изборната кампања на последните парламентарни избори.
Тој на денешното судење го признал делото.
Денешната пресуда следи откако Апелацискиот суд во Скопје ја укина првата пресуда која судијата Лазар Нанев ја донесе лани во август, а со која Панов беше осуден на два месеци затвор.
Тогаш екс градоначалникот тврдеше дека е невин и обвинуваше дека е наместен од СДСМ и невладината Мост.
Поранешниот градоначалник Панов беше обвинет дека на два дена пред парламентарните избори во декември 2016 година, тој во својот кабинет делел пари на негови сограѓани за да гласаат за партијата чии што член е тој.
На единственото рочиште кое се одржа лани во август, сведочеше кавадарчанецот Сали Мемедов, кој тврдеше дека градоначалникот му дал илјада денари за да гласа за ВМРО-ДПМНЕ. Мемедов се потпишал на празен лист, а Панов му се обратил со зборовите: „Ние сме за да си помогнеме еден на друг“.