Градоначалникот на Крива Паланка, Борјанчо Мицевски во соработка со бизнис секторот од општината организираше еднодневна екскурзија за корисниците од Дневниот центар.
Корисниците од Дневниот центар за лица со интелектуална и физичка преченост во Крива Паланка имаа можност да поминат еден поинаков ден надвор од просториите каде го поминуваат своето време.
На дружењето беа присутни раководителот Добринка Давитковска и вработените од Дневниот центар, раководителот Зорица Петровска и претставници на Меѓуопштински центар за социјални работи, претставници од локалната самоуправа со градоначалникот и претседателката на Советот на општина Крива Паланка, Изабела Павловска.
-Благодарение на соработката на локалната самоуправа со бизнис заедницата лицата се дружеа и она што можеше да се забележи со сигурност се насмевките и задоволството на лицата на корисниците со што потврдија дека уживаа во екскурзивниот ден и заедничкиот ручек, докажувајќи дека многу малку е потребно за среќа и дека задоволството и убавините се нешта кои доаѓаат од внатре и се резултат на добрината и љубовта кои човекот ги добива и пружа, истакна Мицевски.
Дневниот центар во Крива Паланка постои повеќе од две децении и е прв во државата од ваков тип. Во моментот услугите на центарот ги користат 22 корисника.