Aналитичарот Сашо Клековски во дебата на „360 Степени“ даде предвидување за исходот од предвремените парламентарни избори кои ќе се одржат во среда.
„Решава и 6-та, но и 3-та изборна единица, колку ВМРО-ДПМНЕ ќе освои предност. Од она што можам да го согледам, пристапот е колку ВМРО-ДПМНЕ ќе победи во 3-ка, толку да се неутрализира во 6-ка од страна на СДСМ, а во останатите некогаш е прашање и на среќа, бидејќи ние имавме случај за 50, за 300, за 600 гласови да се промени односот на силите. Јас не сум сигурен дека СДСМ ќе го постигне својот таргет во 6-ка бидејќи ми се чини дека овие се едни од најконкурентните парламентарни избори меѓу етничките Албанци. Да, 2016 имавме силна БЕСА, силна Алијанса, меѓутоа сепак беа малку во зачеток и едната и другата структура. Сега можам да кажам дека Алијансата е релативно консолидирана, плус дополнета со Алтернатива од Гаши, ќе има многу сериозен предизвик. Тука е прашање и како етничките Албанци ќе одговорат на денот на гласање. Дали ќе сакаат да знаат дали е ДУИ победник, дали Алијанса е победник, што евентуално ќе доведе до концентрација на етнички албански гласови во ДУИ и во ААА. На крај сите се соочуваме, покрај нашите лични преференци, на денот на гласањето за што точно би гласале 14-те партии, сепак одлучува и кого сакаме да видиме како победник на изборите. И можеби гласачи што би се одлучиле да гласаат за други, помали партии условно кажано, да не бидам погрешно разбран, дента ќе се одлучат сепак да гласаат за некоја од 4-те главни политички опции“, вели Клековски.