Пратеничката од СДСМ и поранешна министерка за одбрана, Славјанка Петровска, преку објава на Фејсбук информираше дека Апелациониот суд Скопје ја потврдил првостепената пресуда со која, како што наведува, пратеникот Драган Ковачки е прогласен за одговорен за клевета и навреда.
Петровска потсети дека пред три години Ковачки на повеќе прес-конференции јавно ја обвинувал дека поседува непријавен имот, односно хациенда со базен, тврдења кои, како што нагласува, уште тогаш ги демантирала.
„Најодговорно тврдев дека не поседувам скриен имот и дека посочениот имот никогаш не бил мој. Но, упорно и континуирано се ширеа лаги и дезинформации со единствена цел да се нарушат мојот углед и чест“, наведува Петровска.
Таа посочува дека, и покрај, како што тврди, обидите на Ковачки да ги одолговлекува судските постапки, Апелациониот суд на седница одржана на 23 април 2026 година ја потврдил првостепената пресуда за клевета и навреда.
Според Петровска, оваа судска одлука претставува уште едно разобличување на, како што оценува, лагите и политичките конструкции со кои ВМРО-ДПМНЕ дошла на власт.
„Лаги, конструкции и политички напади беа нивната алатка тогаш, а тоа е нивната алатка и денес. Вистината може да биде напаѓана, одложувана и извртувана, но на крајот секогаш излегува на виделина“, истакнува Петровска, додавајќи дека граѓаните ќе ја дадат конечната оценка на избори.