Битиќи: Со мерката финансиска помош од 14.500 денари за плата за април се поддржани околу 20.000 компании

Мерката за финансиска поддршка од 14.500 денари за исплата на плата за вработени се покажа како ефикасна и навремена и обезбеди сериозна помош во борбата за зачувување на што повеќе работни места, посочи претседателот на комисијата за финансии Фатмир Битиќи на денешната онлајн дискусија „Нова развојна македонска економија“

„Со оваа мерка за месец април поддржани се околу 20.000 компании со околу 130.000 вработени, а поддржани беа и 5.200 самостојни вршители на дејности. Ако се направи анализа на компаниите кои ја добија оваа поддршка, ќе се види дека структурата на поддржаните компании, целосно ја следи структурата на нашата, македонска економија“ порача Битиќи.

Во однос на мерката за месец мај, Битиќи истакна дека постои голема заинтересираност од страна на компаниите.

„Заклучно со вчера веќе има 34.000 апликации за оваа мерка, а околу 90 отсто се веќе одобрени, има уште еден и пол ден и апелирам оние кои се двоумат да поднесат барање и да ја искористат оваа мерка„ повика Битиќи.

Битиќи ја објасни и процедурата за евентуално враќање на средствата од страна на компаниите.

„На почетокот беше кажано дека средствата ќе треба да ги вратат оние компании кои ќе прикажат добивка следната година, но и тука интервениравме. Сега при аплицирање, компаниите можат да побараат нивната поддршка да биде неповратна со тоа што ќе ги исполнат условите за поддршката да стане неповратна. Тоа значи дека ако оваа година продолжат да инвестираат во човечкиот капитал, направат внатрешни инвестиции и слично, нивната помош може да стане неповратна без разлика дали оствариле добивка или не. Секако оние кои нема да го сторат тоа, а при тоа и покажат добивка секако ќе треба да вратат дел од средствата и тоа е правично“ посочи Битиќи.

ПОВРЗАНИ ВЕСТИ

e