Здравствената состојба на пејачката Селин Дион (55) се влошува. Една година по објавувањето на дијагнозата, пејачката повеќе не може да контролира одредени движења на телото, а тоа го потврди и нејзината сестра Клодет Дион.
– Таа нема контрола над своите мускули. Она што ми го кине срцето е тоа што таа секогаш беше дисциплинирана и се грижеше за се. Таа секогаш работеше напорно. Нашата мајка секогаш ѝ велеше: „Ќе го направиш тоа како што треба, ќе го направиш правилно“ – изјавила Клодет за 7Jours.
– Точно е дека и во нашите и во нејзините соништа целта е да се врати на сцената. Во каква форма? Не знам – додаде таа.
Инаку, Селин на крајот на минатата година откри дека се бори со синдромот на вкочанета личност (СПС), необична болест која предизвикува неконтролирани мускулни грчеви.
Тоа е невролошко нарушување кое доведува до вкочанетост на мускулите. Болеста го заклучува телото во положба од која личноста не може да се движи и предизвикува грчеви кои можат да бидат толку силни што дури и ги кршат коските.