Во овие денови на изолација, која најмалите се во домовите, сакаат времето да им биде исполнето со различни активности. Пластелинот е одлична забава за најмалите, бидејќи самите можат да изработуваат најразлични предмети.
Ако немате по дома, овој рецепт за домашен пластелин ќе ви послужи како идеална забава, бидејќи ем е нетоксичен, ем е поевтин во споредба со купечкиот.
Ова е основен рецепт, а може да направите двојна или тројна количина, во зависност од тоа колку пластелин сакате да имате на располагање.
Потребни состојки:
– шолја брашно
– половина шолја сол
– 2 лажички масло
– шолја вода
– половина кесичка лимонтус или вински оцет (може и прашок за пециво)
– прехранбена боја по желба
Подготовка:
Добро измешајте ги брашното, солта и лимонтусот. Во тенџере ставете вода, додајте ги сувите состојки и мешајте додека масата не стане глатка, а потоа додадете и масло.
Ставете го тенџерето на оган, на ниска температура и постојано мешајте да не загори. Кога смесата ќе почне да се одвојува од тенџерето и стане хомогена, тргнете го тенџерето од шпоретот.
Смесата треба да се олади и по желба на детето, додадете боја.
Совет: Ако оладениот пластелин е премногу леплив и не е добар за моделирање, вратете го на шпорет и уште малку мешајте.