Гардијан – Лондон
Шефот на главната агенција на ОН што им служи на Палестинците изјави дека неговите вработени на првата линија паѓаат во несвест од глад, додека бројот на луѓе што умираат од глад во Газа продолжи да расте, а надежите за примирје избледеа поради пропаѓањето на преговорите.
„Оваа продлабочена криза влијае на сите, вклучувајќи ги и оние што се обидуваат да спасат животи во од војната разурната енклава… кога оние што се грижат за другите не можат да најдат доволно храна, целиот хуманитарен систем се урива“, изјави вчера Филип Лазарини, шефот на Агенцијата за помош и работа на Обединетите нации (УНРВА).
Најмалку 45 луѓе починале од глад во последните четири дена. ОН и хуманитарните групи ја обвинуваат блокадата на Израел на речиси целата помош во територијата за недостигот на храна. Лазарини во изјава рече дека колега од територијата му кажал: „Луѓето во Газа не се ниту мртви ниту живи, тие се живи мртовци“.
Тој рече дека УНРВА има еквивалент на 6.000 натоварени камиони со храна и медицински материјали што чекаат во Јордан и Египет и го повика Израел да дозволи „хуманитарните партнери да донесат неограничена и непрекината хуманитарна помош во Газа“.
Во последните денови се појавија извештаи за луѓе што паѓаат во несвест и умираат од глад. Работниците од цивилната одбрана објавија фотографии од изнемоштени тела со малку повеќе од кожа што ги покрива коските.
Медицински извори во Газа соопштија дека уште две лица вчера починале од глад, од кои двете биле болни и не јаделе со денови.
Газа глад (ДПА)
Додека меѓународниот притисок растеше за пробив за ставање крај на речиси двегодишната разорна војна, Емануел Макрон објави дека Франција ќе ја признае палестинска држава на Генералното собрание на ОН во септември.
„Верна на својата историска посветеност за праведен и траен мир на Блискиот Исток, решив дека Франција ќе ја признае Државата Палестина. Ќе дадам формална најава на Генералното собрание на Обединетите нации во септември“, напиша францускиот претседател на Икс и Инстаграм.
Претходно, Израел и САД објавија дека ги повлекуваат своите преговарачи од Доха, каде што се одржуваа мировните разговори. Американскиот пратеник, Стив Виткоф, го обвини Хамас дека не дејствува со добра волја.
„Одлучивме да го вратиме нашиот тим дома од Доха за консултации по последниот одговор од Хамас, кој јасно покажува недостиг на желба за постигнување примирје во Газа“, напиша тој на Икс. Виткоф рече дека САД ќе разгледаат „алтернативни опции“ за враќање на заложниците и „создавање постабилна средина за луѓето во Газа“ без да елаборира кои би можеле да бидат тие алтернативи.
Објавата на Виткоф дојде откако Хамас го испрати својот одговор на последниот предлог за примирје до посредниците. Тоа беше ненадејна промена во однос на оптимизмот ден претходно, кога Асошиетед Прес извести дека израелски функционер рекол дека предлогот на Хамас е остварлив.
Виткоф, исто така, требаше да се сретне со главниот израелски советник, Рон Дермер, и катарскиот премиер Шеик Мохамед бин Абдулрахман ал-Тани во Сардинија, што се сметаше за позитивен знак за разговорите за примирје. Не е јасно дали или кога тие состаноци сè уште се планирани да се одржат.
Предлогот на Хамас вклучува барања за бројот на разменети затвореници, агенциите што ќе бидат дозволени да дистрибуираат помош во Газа и траен крај на војната наместо примирје, објавија израелските медиуми.
Барањата на групата дојдоа додека глобалниот притисок врз Израел за прекин на борбите расте и сè повеќе земји изразуваа ужас од сцените на глад во територијата. Палестински функционер близок до разговорите изјави за Ројтерс дека одговорот на Хамас бил „флексибилен, позитивен и ги земал предвид зголемените страдања во Газа и потребата да се запре гладот“. Извор од Хамас рече дека предлогот вклучувал нов план за размена на затвореници, што за групата било главен приоритет, според Ројтерс.
Форумот на семејствата на израелските заложници, кој ги претставува семејствата на оние што се држат во Газа, лиферуваше изјава во која изрази загриженост за веста дека преговарачите биле повлечени и побара брзо постигнување на примирје.„Секој ден што поминува ги загрозува шансите за закрепнување на заложниците и ризикува да се изгуби можноста за лоцирање на паднатите или добивање витални разузнавачки информации за нив“, се вели во изјавата.
Договорот што беше разгледуван се очекува да вклучува 60-дневно примирје за време на кое Хамас би ослободил 10 живи заложници и телата на 18 други во замена за палестински затвореници.
За време на периодот на примирје би се одржале разговори за постигнување траен мир и би се зголемила помошта за опколената територија. Сериозна перспектива за примирје во Газа се појави дури по завршувањето на војната меѓу Иран и Израел минатиот месец. Како што преговорите продолжија, израелските напади се интензивираа. Најмалку 89 луѓе се убиени во последните 24 часа додека израелските воздушни напади го бомбардираа централниот дел на Газа, соопштија здравствените власти.
Израел вели дека глобалните медиуми ја преувеличуваат големината на кризата со глад, иако хуманитарните групи и сликите од Газа покажуваат јасни докази за глад, а лекарите што лекуваат неухранети деца велат дека самите не можат да се нахранат доволно. Израел дозволува само минимален проток на помош во Газа, од кој огромното мнозинство го дистрибуира Хуманитарната фондација на Газа (GHF), приватна американска фирма. GHF управува со четири точки за дистрибуција на храна, каде работат американски платеници, систем што е опишан како смртоносна замка. Повеќе од 1.000 луѓе што барале помош биле убиени обидувајќи се да пристапат до залихите во речиси два месеца откако GHF почна да работи во Газа.
Претходно, помошта се дистрибуираше преку повеќе од 400 дистрибутивни точки под систем предводен од ОН, но Израел речиси целосно ја запре помошта на ОН во територијата од март. Израел го обвинува Хамас дека краде помош од ОН, тврдење за кое хуманитарците велат дека има малку докази. Хуманитарните групи велат дека GHF, кој требаше да го замени ОН, нема капацитет да го стори тоа и дека неговиот милитаризиран модел ги крши клучните хуманитарни принципи.
Враќањето на системот за помош на ОН како дел од договорот за примирје е клучно барање на Хамас. Израелските преговарачи го омекнаа својот став по ова прашање додека притисокот расте дури и во Израел за запирање на кризата со глад, која генералниот директор на Светската здравствена организација, Тедрос Аданом Гебрејесус, во средата ја опиша како создадена од човек.
Илјадници израелски демонстранти што носеа вреќи со брашно и слики од палестински деца што починале од глад протестираа во Тел Авив во средата, повикувајќи на крај на блокадата на Газа. Хамас, исто така, повикува договорот за примирје да вклучи траен крај на војната во Газа, нешто што Израел го одби.
Договорот за примирје е непопуларен меѓу поекстремните членови на кабинетот на Бенјамин Нетанјаху, а Израел се обидува да ја задржи можноста за повторно започнување на војната по периодот на примирје.
ФОТО: CNN