Претседателот Талат Џафери ги отстрани сите дилеми и го соопшти договорот на партиите на власт – нема да има одлагање, локалните избори ќе се одржат во предвидениот термин, на 15 октомври.
Во Македонија сите востанија се или преуранети или задоцнети, вели еден афоризам. Така е и со изборите. Но, очигледно е дека партиите на власт одлучиле да ја прекинат јаловата дебата за терминот на изборите што се води во некои кругови. Никола Груевски нема да добие шанса да толкува, да спинува и да ја искористи дебатата во своја корист. Обвинетиот сонува да се врати на власт, еве му шанса да види дали вреди да продолжи да сонува, или да почне да се трезни.
За нас, граѓаните на Македонија кои гласавме и се изборивме за промени, сега е најважно да се фокусираме на главната цел – да не му дозволиме на поразениот режим да се повампири. Тоа за оваа земја не е прашање на партиска или дури и на политичка определба, тоа е прашање на опстанок на идејата оваа земја да се реформира, да напредне и да стане дел од НАТО и од ЕУ.
Резултатот на изборите не мора да покаже дека новата централна власт е цврсто, или, не дај боже, автократски консолидирана. За тоа не се боревме. Но, резултатот мора да биде охрабрувачки сигнал дека во јавниот политички дискурс во Македонија сè уште преовладува и се зацврстува свеста за неопходноста од реформи и промени. Со други зборови, тоа мора да се почувствува и на локално ниво.
За да се случи тоа, ќе биде потребно да се вложи многу труд, посветеност, но и знаење и умешност во водењето на политиките. Централната власт сега самостојно и непречено ги димензионира своите кадровски и други капацитети за водење на политиките, а тоа ќе биде клучно и за локалните избори. Она што сега се сее, ќе се жнее на 15 октомври.
На здравје локални избори! Да се надеваме на најдоброто!
Бранко Геровски за Плусинфо