Јас лично сум против промена на Устав, промена на химна, знаме, грб. Со вадење на народ на улица ВМРО-ДПМНЕ сака да создаде заштита на бандитизмот, под превезот на себезаштита. Груевски ја навлекува Македонија во подлабока криза, изјави лидерот на СДСМ, Зоран Заев во првото интервју по изборите на 24 Отворено.
„Не е разговарано за никаква платформа, со Ахмети разговаравме како да се вратат парите назад. Будалаштини се дека ќе бидат казнувани тие што не зборуваат албански јазик. Во моментов 33 општини се двојазични. Ги манипулираат луѓето дека се воведува двојазичност или дека парите ќе бидат двојазични. Такво нешто нема“, рече Заев.
Тој е уверен дека на крајот претседателот, Ѓорге Иванов ќе му го даде мандатот, бидејќи, како што вели, така е исправно, а како следен чекор најави избор на претседател на Собранието.
Дали ќе излеземе од политичката криза која отвара нови патишта на раздорот, меѓуетнички, национални, но и домашни пресметки..Која ќе биде цената што треба да се плати за излез од овој безизлез. Во 24 Отворено лидерот на СДСМ, Зоран Заев одговораше на прашањата на новинарите Младен Чадиковски, Катерина Блажевска, Насер Селмани, публиката во студиото и гледачите..