Денеска се одржа подготвително рочиште по тужбата на Вице Заев, братот на премиерот Зоран Заев за Александар Николовски, потпретседателот на ВМРО-ДПМНЕ. Заев го тужи Николовски за навреда и клевета за изјава дадена на гостување во „Отворено студио“ на „1ТВ“ на 24 октомври лани и бара оштета од 30.000 денари (500 евра).
Николовски наводно рекол дека братот на премиерот станал бизнис фактор во државата благодарение на наместени тендери.
На рочиштето Заев не се појави, неговите ставови ги брани адвокатот Горан Заев кој му е роднина. Во тужбата, Вице Заев тврди дека Николовски со клеветата изнел невистинити факти, штетни за честа и неговиот углед. Како што стои во тужбата, изјавата на Николовски е невистинит факт, бидејќи Вице Заев е докажан стопанственик во Македонија и ниту имал наместено тендери, ниту е главен бизнис фактор во државата. Изјавите на Николовски резултирале со чувство на вознемиреност, напнатост и намалено расположение, пропратено со вегетативна симптоматологија, потење и црвенило на лице кое нешто предизвикало силна душевна болка кај него“, објави Сакам да кажам“.