Ниту еден државен орган во Србија нема потврда дека на југот на земјата минатата недела било запленето големо количество оружје кое требало да биде префрлено во Македонија, вели за „Фокус“ висок функционер од српската влада.
Големата заплена на неколку илјади пушки, митралези, минофрлачи и рачни бомби, како што вели изворот на „Фокус“, е измислица на луѓе во српските воено-безбедносни структури.
Медиумите во Србија, повикуваќи се на извори на српската воено-безбедносна агенција (ВБА) минатиот четврток јавија дека најверојатно оружјето било наменето за припадници на најголемите албански партии, чии функционери учествувале во вооружените судири во Македонија и на Косово.
„Оружјето очигледно било наменето за употреба ако дојде до разгорување на судирите во Македонија или можеби токму за предизвикување инцидент, но пешадиското оружје можеби требало да послужи дури и за евентуално преземање на власта“, го пренесе „Блиц“ тврдењето на изворот од воено-безбедносната агенција.
Медиумите во Србија пренесоа дека и во деновите пред да се случи заплената ВБА забележала и зголемено движење на Албанци од подрачјата на Прешево и на Бујановац кон Македонија, а според агенцијата, слично е и со Албанците од Косово, и тоа главно поранешни припадници на ОВК, пишуваше српскиот весник, напоменувајќи дека за сè биле известени надлежните македонски служби.