Мнозинството млади луѓе во Македонија имаат позитивен став кон Европската Унија, но речиси половина не веруваат дека земјата некогаш ќе стане членка на ЕУ, покажува анкетата спроведена во јуни 2025 година од страна на Институтот за добро управување и евроатлантски перспективи (ИДУЕП Скопје), Европскиот центар за извонредност од Брисел, и германската Фондација за слобода „Фридрих Науман“, а во соработка со младинската платформа „Студентарија“.
Според анкетата, младите луѓе во земјата ја гледаат ЕУ како позитивен пример, но се чувствуваат дистанцирани од процесот на европска интеграција. Авторите на анкетата нагласуваат дека младите треба да се третираат како активни партнери, а не само како гледачи.
Резултатите од анкетата покажуваат дека 41 процент од младите луѓе во земјата имаат позитивен став кон ЕУ, 24 проценти – негативно, а 35 проценти од оние што учествувале во анкетата одговориле „неутрално“.
Николовски: Стопирана ИПАРД програмата поради корупцискиот скандал со директорот на Платежната агенција
Во однос на членството на Македонија во ЕУ, 46,5 проценти од испитаниците не веруваат дека земјата некогаш ќе стане дел од ЕУ, 35,8 проценти веруваат дека тоа е можно, но во подалечна иднина, а само 6,7 проценти очекуваат земјата да стане членка на ЕУ во следните пет години.
Главната пречка за интеграција, според 84,6 проценти од испитаниците, е корупцијата, проследена со билатерални спорови (61 процент) и ниска доверба во институциите (60 проценти). Младите во Македонија го идентификуваат домашниот политички контекст како најголем проблем, барајќи конкретни мерки против корупцијата и поголема одговорност.
Повеќе од половина од испитаниците (53 проценти) веруваат дека се соодветно информирани за политиките на ЕУ, а 22 проценти велат дека се „многу информирани“.
Најголем интерес кај младите е за можностите за работа и живот во ЕУ (76,2 проценти), образовни програми (55,1 процент), човекови права (50 проценти), заштита на животната средина (48 проценти) и дигитализација (44,5 проценти).
Над 70 проценти од младите луѓе кои учествувале во анкетата се изјасниле дека се социјално неактивни, а само 8 проценти учествуваат во политички или граѓански иницијативи. Ова, според публикацијата, укажува на „широко распространето чувство на немоќ“ и потреба од проактивни мерки за вклучување на младите луѓе во демократскиот живот, пишуваат медиумите во земјата.
На прашањето која земја од Западен Балкан има најголеми шанси да стане членка на ЕУ во следните пет години, 53 проценти од испитаниците рекле Албанија, по што следуваат Црна Гора (34,5 проценти) и Србија (14,7 проценти).
Анкетата е спроведена онлајн меѓу 1.000 млади луѓе, од кои 81,5 проценти биле студенти.