Амет Бејтула на 13 октомври „алфите“ го уапсиле и веднаш бил однесен на издржување 5 годишна затворска казна во затворот Идризово, објави Телма.
Полицијата извршила наредба по објавена потерница која стои и на сајтот на МВР. Но, само по половина месец Бејтула го напушти затворот по одлука на Врховниот суд да му ја поништи пресудата и да го врати предметот на судење од почеток.
Бејтула од затворот излезе со наредба од судот во Тетово во која пишува дека веднаш треба да биде пуштен од Идризово. Додека беше во затворот Врховнот суд одржал седница на која било одлучено пресудите од пред три години на Основниот и две години на Апелациониот суд да бидат укинати и да му се дозволи повторно судење.
Бејтула е дел од деветчлената банда осудена дека 29 август пред 14 години на магистралниот пат Тетово – Гостивар како припадници на терористичката АНА киднапирале петмина Македонци.