Министерот за здравство Венко Филипче на прес-конференцијата вечерва потврди дека попладнево на коронавирус биле тестирани 10 пациенти, од кои 5 се позитивни на вирусот.
Позитивна е сопругата на веќе дијагностицираниот пациент од Скопје и 4 здравствени работници – двајца доктори и две медицински сестри од Дебар.
Се работи за здравствени работници во приватна здравствена установа во Дебар.
Од утре во болницата во Дебар ќе престојуваат и двајца доктори од Клиниката за пулмологија од Скопје, рече Филипче.
Со ова, бројката на заболени со коронавирус во земјата се искачи на 31.
Филипче рече дека нивото на свест за почитување на препораките мора да биде на високо ниво.
„Овие здравствени работници имаат семејства кои се грижат за нив, тие пожртвувано работат. Трудот и напорот којшто го даваат здравствените работници е непроценлив“, рече Филипче и уште еднаш ги повика граѓаните да ги почитуваат мерките.