ДУИ и нејзините кадри кои се на чело на општините со албанско население не се заинтересирани за одложување на локалните избори. Потпретседателката на ДУИ, која е на чело на општина Тетово, Теута Арифи, изјави дека ДУИ бара да се почитува законскиот рок, за изборите да можат да се одржат во првата половина на мај, пренесува Алсат-М.
„На последното заседавање на Претседателството дискутиравме и на оваа тема и нашиот став е дека изборите треба да се одржат кон крајот на првата половина на мај бидејќи сметаме дека и онака имаме мало продолжување на мандатот на градоначалниците. Што се однесува на граѓаните и нивните интереси, општините се поврзани со многу практични прашања и добро би било овие изборни процеси да бидат завршени во одредените рокови.“ – изјави Теута Арифи, потпретседателка на ДУИ
„Ставот на ДУИ е дека треба да се почитува рокот за одржување на локалните избори бидејќи тоа е во корист на сите граѓани на локално ниво и ги вклучува сите општини на национално ниво. Ние си го сработивме своето и ја почитуваме демократијата и гласовите на граѓаните. Како и да гласаат, нека гласаат. Но, треба да се изберат луѓе во локалната власт кои ќе им служат ним.“ – изјави Невзат Бејта, потпретседател на ДУИ.
Последниот рок за распишување на локалните избори истекува денеска. Доколку изборите не се одржат во мај, градоначалниците на општините и општинските совети повеќе нема да имаат никакви надлежности.