Уште 15 дена преостануваат за пријавување на дијаспората за гласање на претстојните избори, а досега, како што информираат од ДИК преку електронското пријавување за гласање на иселениците аплицирале 2.099 гласачи.
Од нив прифатени прифатени се 1.413 пријави, 61 се одбиени, а 625 се во обработка. Рокот за аплицирање истекува на 11 ноември по што и конечно ќе се знае колку од нашите иселеници во странство ќе гласаат во 47-те дипломатско конзуларни претставништва на Македонија кое ќе се одржи на 10 декември, ден пред изборите.
Од тоа ќе зависи и дали ќе се избере пратеник од дијаспората, бидејќи на овие избори ќе се применува пропорционален, а не мнозински модел како во 2011 и 2014.
Според измените на Изборниот законик што произлезе од договорот на четирите политички партии, прагот, за избор на пратеник од дијаспората ќе биде најмалиот број гласови со кој е добиен пратенички мандат во Македонија, но доколку кандидатите од иселениците освојат гласови под тој праг тогаш ќе се смета дека не е избран пратеник од седмата изборна единица.
Практично од тоа колкав ќе биде одзивот на гласачите во шесте изборни единици и по обработката на резултатите од гласањето ќе се знае колку гласови ќе бидат потребни за мандат од иселеништвото и со тоа ќе зависи и дали воопшто ќе биде избран пратеник од дијаспората.
Но ако се повтори одзивот од претходните избори, мала е веројатноста дека е можно мандат да добие пратеник од дијаспората.
Бројките од парламентарните избори во 2014 покажуваат дека ниту еден од тројцата пратеници на ВМРО-ДПМНЕ ни приближно не добија гласови за најнискиот праг.
На последните парламентарни избори најмалиот број гласови со кој беше избран пратеник во земјава беше околу 7.500, додека, пак, сите тројца народни избраници од дијаспората заедно собраа околу 6.500 гласови, со што беше доведено во прашање еднаквоста на правото на глас.
Клучната новина е што на пратеничките листи кои ќе ги предложат партиите ќе има по тројца кандидати, место како што беше претходно со три листи од Европа, САД и Австралија.
Токму за ова неодамна реагираше Васко Наумовски, пратеник од изборната единица во Австралија. Тој во отвореното писмо наведе дека не се согласува со фузирање на трите во една изборна единица, поради тоа што доколку биде избран само еден пратеник тој нема да може да ги застапува интересите на дијаспората од секаде.
Инаку, од утре Државната изборна комисија ќе го стави на увид избирачкиот список. Во следните 15 дена граѓаните ќе имаат можност да проверат дали ги има на списокот со точни податоци, но и да пријават евентуални неправилности.
Извор: 24 Вести