Традиција која трае речиси еден век. Дебармаалци и ова прво утро од Новата година, го свртеа орото пред култната кафана Идадија.
Точно напладне, со “Ој Вардаре Македонски” и “Македонско девојче” се прослави дочекот на 2020-тата, а со чашка ракија, вино и мезе се наздрави и за новото кумство.
Прославата наредната година ќе ја организира новинарот Тони Стојановски. Со кршење на погачата и предавање на бајракот, тој го презеде кумството од Роберт Бојаџиевски. Новиот кум порача дека ваквите традиции се многу важни, бидејќи ги одржуваат во живот малите народи како македонскиот.
Посакувајќи здравје и успешна година, досегашниот кум повика да се продолжи обичајот кој го практикувале и нивните прадедовци.
92-ра година по ред “Идадија” е место кое ги собира дебармаалци на првиот ден од Новата Година. Старите скопјани се особено горди на традицијата. Таа трае од изградбата на кафаната во 1928-та. Дружењето почнува истата година со неизбежната песна и оро, обичај кој речиси еден век подоцна е задолжен за зачувување на стариот градски дух.
Извор: Сител