Градоначалникот на Крива Паланка Борјанчо Мицевски, денеска одржа првичен состанок со дел од претставниците на месните заедници од општина Крива Паланка.
Во своето обраќање пред присутните Мицевски рече:
–Идејата за иницирање на овој тип на средба, пред се доаѓа од мојата изборна програма, како и од чувството на одговорност и обврска на човек кој ја превзема функцијата Градоначалник на општината. Мојата намера е да оствариме подобар линк, зголемена комуникација и унапредена соработка во областите кои ќе бидат ваши потреби и приоритети.
Со доаѓање на градоначалникот Мицевски, во општината се создаде и нова клима за возобновување и унапредување на месните заедници, како битен елемент на локалната самоуправа со што се овозможува на граѓаните да придонесуваат за нејзино подобро функционирање во целина како и непосредно да ги согледуваат проблемите на заедничкиот живот, да расправаат за можностите за нивно решавање, да донесуваат одлуки и да здружуваат средства и непосредно да се ангажираат во спроведувањето на заеднички донесените одлуки.
Градоначалникот нагласи дека во постапката за основање, како и во понатамошното функционирање на месните самоуправи, општинската администрација секогаш ќе биде во координација со нив и сите иницијативи и активности ќе бидат помогнати и поддржани, со стручна, техничка и материјална подршка од општината.
На средбата се договори временската рамка за остварување на состаноците за основање на месните заедници и избор на нови раководства, конкретниот начин на комуникација со општинската администрација како и соодветната техничка и стручна помош што ќе ја обезбеди општината.
