Секоја општина има свои вредности и значајни обележја кои ја величат. За општина Крива Паланка, таква вредност е името и делото на Јоаким Крчовски. На просторот на кој се пресретнувале и вкрстувале различните култури делото на даскал Хаџи Јоаким Крчовски ќе го пресретне и означи почетокот на новото време во македонската културна историја.
По повод одбележување на 205 години од делото на Јоаким Крчовски денеска во општина Крива Паланка беше промовирана и книгата “Јоаким Крчовски во народната и духовната традиција”, чиј автор е Д-р Јордан Михајловски.
Воведен збор имаше градоначалникот на о.Крива Паланка, Борјанчо Мицевски, кој свечено се обрати на присутните, Митрополит Кумановско-Осоговски, господин Јусуф, претставниците од Македонската-Православна Црква, општинската администрација и гости од соседна Р.Бугарија.
Во овие моменти верувам и кај вас како и кај мене навираат низа на емоции и чуства, бидејќи она што денес го правиме како Локална самоуправа, како Градски Музеј и Македонска-Православна Црква е нешто како копнеж кај секое живо битие дали порано, или подоцна го чуствуваме и се навраќаме, а тоа е културниот идентитет на нашето постоење-истакна градоначалникот Мицевски.
Моштите на Св.Јоаким Крчовски се во паланечката црква Св.Димитрија, токму тоа беше и основниот мотив да самите на себе си дадеме една морална поткрепа за сето она што сме го имале во текот на историјата, за нашето битие и постоење, но сето тоа да го обновиме како колективна меморија и да го пренесеме на идните генерации-додаде Мицевски.
На промоцијата свое предвање имаше и Проф. Д-р Лилјана Гушевска од Институтот за национална историја-Скопје.
Промотор професор Д-р Маја Јакимовска Тошиќ од Институтот за национална литература-Скопје беше даден вовед за книгата на авторот Јордан Михајловски. Додека, пак, самиот автор започна со истакнување на периодот и просторот на кој се пресретнувале и вкрстувале различните култури, како и за делото на Хаџи Јоаким Крчовски кое го означува почетокот на новото време во македонската културна историја.
-Оваа пригодна книшка посветена во чест на 205 годишнината од отпечатувањето на неговото прво книжевно дело Слово исказаное заради умирание, во 1814 година, ни од далеку не го исцрпува интересот , и сознанијата за неговиот живот и дело. Таа е повеќе симбол на нашата благодарност и почит кон него како деец, поклоник и свештеник, учител и преродбеник, книжевник и духовник и на неговото возвишено и благородно дело .Воедно ова е и израз на роднокрајна должност, истражувањето да се насочи кон осветлување на нови моменти од неговиот живот ,народната и духовната традиција и родословието со цел да се пополни една празна страница од неговата биографија-рече авторот Јордан Михајловски.
По повод свеченоста за ликот и делото на Јоаким Крчовски, денеска, исто така, беше одбележан и денот на ОУ “Јоаким Крчовски” кое бележи 71 година од постоењето. По тој повод во училишниот двор се наоѓа биста, која денеска и официјално беше откриена од страна на Директорот на училиштето, Дане Петровски и градоначалникот на општината, Мицевски.
Со кратка програма учениците преку песни и рицитали го истакнаа големото дело на Јоаким Крчовски. Преку нив уште еднаш не потсетија и го оживеаа аманетот и делото на нашиот прв преродбеник даскал Крчовски. Ова наследство треба да се чува . Од даскал Јоаким Крчовски ја разбравме смислата на животот-судбината на јазикот е судбината на народот!