Традиционално по десетти пат и оваа година се одржа културната манифестација “Невистинско поклонение” на Свети Тeодор Тирон во кривопаланечкото село Конопница. По повод празникот, денес во кабинетот на градоначалникот на Крива Паланка, Борјанчо Мицевски, се одржа прием на гости: Министерот за земјоделство, шумарство и водостопанство Љупчо Николовски, Министерот за внатрешни работи Оливер Спасовски, градоначалниците на Кратово и Ранковце, Претседателот на Советот на општина Крива Паланка, Изабела Павловска и на Советот на општина Куманово, Атина Мугашанска, како и претставници од Советите на општините Трговиште и Босилиград и претставници од општинската администрација. На овогодинешната јубулејна десетта културна манифестација учествуваа десет невести и свекрви кои го означија “Невистинско поклонение 2019”.
На “Невистинско поклонение 2019” имаше учесник-невеста од Бисилиград и невеста од Пијанечко-Малешевската свадба. Се очекува од година во година оваа бројка драстично да расте и манифестацијата да премине во масовно одбележје со рекорден број на учесници и од останатите краеви. Невестите добија благослов од Бога за среќа, потомство и зајакнување на брачните врски, додека пак, градоначалникот на Крива Паланка, господинот Борјанчо Мицевски им подари букет цвеќе.
Оваа година покровител на културната манифестација “Невистинско поклонение 2019” е општината Крива Паланка во соработка со претседателот на “РСР Патник”, Стојанче Величковски, а како подршувачи на истата се: Центар за култура на општина Крива Паланка, локална установа Градски музеј на општина Крива Паланка, Македонска Православна Црква, месна заедница и локалното население.
Во изминатите десет години се смета дека вкупно учествувале приближно околу сто невести учеснички. За разлика од минатата година и годините пред тоа, оваа јубилејна година бележи и зголемен број на учеснички. Ова е доволен показател дека културната манифестација “Невистинско поклонение” на Свети Тодор Тирон преминува во масовна традиција, која е и бележје на градот Крива Паланка, но и белег на село Конопница.
Автор,
Р.А.