Чак Норис почина на 86-годишна возраст. Мајсторот на боречките вештини, кој стана икона на акционите филмови и ѕвезда на култната серија „Вокер, тексашки ренџер“, беше примен во болница на Хаваите во четвртокот, а неговото семејство денеска наутро ја потврди веста за неговата смрт.
Во текот на животот беше познат по својата исклучителна виталност, а до последните години одржуваше завидна физичка форма и општо здравје што можело да се припише на многу помлада личност. Неговата тајна лежела во дисциплинирана комбинација од исхрана базирана на намирници од цели зрна и редовно вежбање што вклучувале тренинг за сила и кардиовежби, пишува НАД.
Норис се придржувал н балансирана исхрана богата со намирници од цело зрно и хранливи материи што ја поддржуваат долговечноста. Неговото мени се базирало на немасни протеини како што се пилешко на скара, мисирка и риба, кои обезбедуваат есенцијални аминокиселини за одржување и закрепнување на мускулите.
Тој исто така консумирал многу зеленчук како брокула, спанаќ и кељ, богати со витамини, минерали и антиоксиданти. Изворот на енергија го пронашол во сложените јаглехидрати од житарки од цели зрна како што се кафеавиот ориз и киноата, а редовно вклучувал здрави масти како што се авокадо и јаткасти плодови во својата исхрана, како и многу свежо овошје, особено агруми и бобинки.
Избегнувал високо преработена храна полна со адитиви, конзерванси и нездрави масти, како и засладени напивки, како газирани пијалаци и овошни сокови, а и пржена храна. Иако не го елиминирал целосно црвеното месо, го намалил неговиот внес на минимум, а исто така избегнувал и рафинирани јаглехидрати како што се белиот леб и слатките грицки.
Посветеноста на Норис кон физичката кондиција датира од 1958 година, кога почнал да тренира во боречката вештина танг су до на 18-годишна возраст. Преку тренингот, ја научил важноста на одржувањето на своето тело во врвна форма. Основата на неговиот пристап е зачувувањето и градењето на мускулната маса, бидејќи мускулот е метаболички активно ткиво кое согорува калории дури и во текот на мирување.
За таа цел, тој практикувал вежби со сопствена тежина, како што се склекови, клекувања и исчекорувања, и вежби со слободни тегови. Исто така, редовно правел и кардиовежби, користел лента за трчање, пливал и практикувал брзо одење.
За да развие ментална бистрина, да го намали стресот и да одржи позитивен став, секојдневно практикувал медитација и техники на свесност. Еден од неговите приоритети бил квалитетен и доволен сон, а иако бил посветен на својата кариера и обука, Норис инсистирал на рамнотежа помеѓу работата и приватниот живот и одвојувал време за семејството и одморот за да избегне исцрпеност.