Американската поп пејачка Бритни Спирс го изрази своето незадоволство по повод снимањето на документарни филмови за нејзиниот живот, истакнувајќи дека истите се од навредлив карактер и дека немале позитивно влијание врз судската одлука за укинување на старателството кое над неа го имаше нејзиниот татко од 2008 година.
Пејачката од 2008 година, со одлуката на судот немаше контрола над своите финансии како ни прилика за донесување одлуки кои се однесуваа на некои важни прашања во нејзиниот живот.
Старателството конечно беше укинато во ноември минатата година, а јавноста шпекулираше дека за таквата одлука на судот придонеле документарните филмови за Бритни.
Пејачката сега навела дека сите филмови за неа биле со навредлив карактер.
„Никогаш не сум се чувствувала повеќе малтретирано во оваа земја. Тоа е лудо… и ајде, сериозно, дали е навистина легално да се снимат толку документарци за некого без негова дозвола?“, напишала Бритни на Инстаграм и додала:
„Сериозно, размислете за тоа… Никогаш не сум видела толку документарни филмови за некоја личност… Вил Смит, Гвинет Полтроу, Џенифер Лопез… Ниту една личност на оваа планета не би го сакала тоа – да се ископаат толку негативни снимки и да се направат специјални часови тврдејќи дека тоа ми „помага“. Навистина?“.
За животот на американската ѕвезда се снимија 3 документарни филмови за краток временски период: „Framing Britney Spears“ на „Hulu“, „Britney vs Spears“ на „Netflix“ и „Britney Spears“ на „BBC“.