Со Божествена литургија со која богослужеше митрополитот Кумановско-осоговски г.Јосиф во храмот на манастирот „Свети Јоаким Осоговски“ во Крива Паланка почна чествувањето на денешниот празник Успение на Пресвета Богородица.
На литургијата присуствуваа и премиерот на Република Македонија, Зоран Заев, Министерот за внатрешни работи, Оливер Спасовски, Министерот за земјоделство, шумарство и водостопанство, Љупчо Николовски, бројни верници.
„На сите христијани во Република Македонија ви го честитам празникот – Успение на Пресвета Богородица. Ова е празник на радоста и љубовта. Споделувањето на овие вредности, љубовта и радоста, заедно со добрината нè упатува на помислата која многу често ја забораваме под притисокот на минливите, дневни искушенија, кои стануваат решливи доколку им приоѓаме со добрина, љубов и радост. На тоа нѐ повикува и овој голем празник. Како добри луѓе, кои сакаме да си помагаме, меѓусебно да си пружиме рака и заедно да се надеваме на подобра иднина на сите нас, во нашата земја.“ – вели во честитката по повод празникот премиерот Заев.
По литургијата во кривопаланечкиот манастир беше осветена и реконструираната костурница под камбанаријата.
Утринска света литургија се одржа и во соборниот храм „Св.великомаченик Димитриј“ по што се одржа Литија посветена на Св.Јоаким Осоговски. Литијата низ главната улица се движеше до црквата „Св.Богојавление“ пред општината.
Чествувањето продолжува вечер со вечерна богослужба во 18 часот во манастирот, а утре ќе се одржи света божествена литургија по повод чествување на патрон-светецот, со која ќе чиноначалствува архиепископот Охридски и Македонски, г.г. Стефан.