Претседателот на СДСМ, Зоран Заев, заедно со заменик-претседателката Радмила Шекеринска, во Виена се сретнал со Ханес Свобода, претседател на Меѓународниот институт за мир, член на одборот на Форумот за меѓународен дијалог „Бруно Крајски“ и поранешен координатор на пратеничката група на социјалдемократите во Европскиот парламент.
Тие изразиле заедничка согласност дека мора да организираат и да спроведат регуларни предвремени парламентарни избори на 11 декември, за потребата од функционирање на правото и правната држава, како и за итна потреба од враќање на земјата на демократскиот пат преку избор на легитимна Влада.
– Имаме готови планови, што ќе направиме во првите шест месеци и во следните две години. Ќе го подигнеме стандардот на граѓаните и ќе овозможиме развој на домашните претпријатија и истовремено ќе го демократизираме општеството. Се обврзуваме на целосно спроведување на реформските приоритети од извештајот на Прибе – соопшти Заев.
Вечерва во 19 часот, во Форумот за меѓународен дијалог „Бруно Крајски“, претседателот на СДСМ, Зоран Заев, ќе одржи предавање на тема „Македонија на крстосница“.
За поврзани вести продолжете надолу