Во ковид центрите во Скопје во изминатите 24 часа хоспитализирани се 12 нови пациенти поради компликации од корона вирусот со што вкупно 242 лица сомнителни и потврдени за Ковид 19 се лекуваат на инфективните одделенија во главниот град, информира Министерството за здравство.
Во последното деноноќие, на Интерните клиники имало три приеми. Во ковид центарот во ГОБ 8 Септември имало пет примени пациенти, а три биле примени на Клиниката за инфективни болести и фебрилни состојби во текот на вчерашниот ден. Во изминатите 24 часа дома се пуштени 34 оздравени пациенти.
Во ковид центрите на Интерните клиники се лекуваат 68 пациенти. Во ГОБ 8 Септември има вкупно 89 болни, а на Клиниката за инфективни болести и фебрилни состојби лежат 80 пациенти, додека на Иститутот за белодробни заболувања кај децата-Козле има четири пациенти. На Клиниката за детски болести има едно дете позитивно на Ковид 19 вирусот.
-Вкупно 242 пациенти потврдени и сомнителни за Ковид 19 се лекуваат на инфективните одделенија во болниците во главниот град. Голем дел од пациентите се на кислородна поддршка. Бројот на приеми во изминативе денови се намалува и утрово до 8 часот имало 300 слободни места, а се очекува во тек на денот по направените исписи на оздравените пациенти да се ослободат и дополнителни места, соопшти Министерството за здравство.
Сите инфективни одделенија имаат довод на кислород и можат да згрижат пациенти кои имаат потреба од кислородна поддршка.