На скалите од влезот на Собранието пратеничката група на ВМРО-ДПМНЕ одржа прес конференција, на која рече дека и по координациите не го прифаќа референдумското прашање онака како што е формулирано. Пратеникот Игор Јанушев изјави дека пратениците на ВМРО-ДПМНЕ ќе присуствуваат на собраниската седница на која треба да се распише референдумот, а за тоа дали како партија ќе го бојкотираат или не, рече дека останува на партиските органи да се поризнесат.
-Продолжува самоволието на парламентарното мнозинство и тоа за најважното прашање. Свесни дека е штетен договор и дека е спротивен на волјата на граѓаните се обидуваат со сила без прифаќање на аргументите на опозицијата да протуркаат повеќезначно, бесмислено и манипулативно прашање – изјави Јанушев.
Според него, на овој начин парламентарното мнозинство брутално гази по воспоставената демократска практика, бидејќи, рече тој, секое референдумско прашање мора да биде донесено по пат на консензус.
-ВМРО-ДПМНЕ не ја прифати улогата да биде алиби на власта. Прашањето мора да биде еднозначно. Прашања поврзани со други теми се двосмислени и доведуваат до заблуда. Тоа е исто како да поставиме прашање дали сте за просечна плата од 500 евра за секое семејство поддржувајќи ги коруптивните политики на Владата. Дали сте за намалување на невработеноста поддржувајќи ги криминалниот тендер во Министерството за здравство. Во сите овие прашања има контрадикторност. Ова е доказ дека власта е исплашена бидејќи договорот не поминува кај народот. СДСМ сака да ја изигра волјата на народот и на сила да протне капитулантски договор. Барам парламентарното мнозинство итно да се откаже од ваквото насилничко однесување – рече тој.