Владата обезбеди милион и половина евра за кампањата за референдумот што ќе ја води Собранието како овластен предлагач. За обезбедување на парите од тековната буџетска резерва е задолжено Министерството за финансии
Доколку на крајот на кампањата има непотрошени средства, тие ќе бидат вратени во Буџетот на Република Македонија, се вели во соопштението од Владата.
Оттаму велат дека одлучиле да спроведат објективна, транспарентна и рационална кампања преку планска комуникација со јавноста, која ќе има за цел да ги прикаже придобивките за граѓаните од влезот на Македонија во Европската Унија и во НАТО и да им го објасни Договорот за името и Договорот за стратешко партнерство.
Од Владата со кампањата ќе ги повикаат граѓаните да го остварат правото на глас и да преземат одговорност за носење на важните одлуки.
Кампањата ќе се води преку традиционалните, но и социјалните медиуми за кои ќе бидат обезбедени 7.500 евра од редовниот буџет на Генералниот секретаријат на Владата, како и преку теренски посети, неформални средби, состаноци, гостувања и учество на јавни настани.