Денешниот ден уште еднаш покажа дека сите ние заедно сме обединети за влез на Македонија во ЕУ и НАТО, а само Христијан Мицкоски и раководството на ВМРО-ДПМНЕ се против, изјави Костадин Костадинов, пратеник од редовите на СДСМ.
„Колку и да се обидува, ВМРО-ДПМНЕ нема да ја закочи македонската иднина. Граѓаните слободно, без притисоци и достоинствено, ќе дадат поддршка за влез на Македонија во ЕУ и НАТО преку прифаќање на договорот со Грција“, рече Костадинов.
Тој додаде дека гласот на граѓаните ќе биде клучен за македонската иднина.
Попладнево Собранието со 68 гласа „за“ ја донесе одлуката за распишување референдум, кој ќе се одржи на 30 септември и ќе биде консултативен. Референдумското прашање ќе гласи: Дали сте за членство во ЕУ и НАТО преку поддршка на договорот помеѓу Република Македонија и Република Грција? На гласањето не присуствуваа пратениците од ВМРО-ДПМНЕ и Алијансата за Албанците.