Професорката Билјана Ванковска ги подучува иселениците да се пријават за изјаснување, но да не гласаат на референдумот на 30 септември во дијаспората. На тој начин, професорката која не се согласува со политиките на актуелната власт, на истомислениците-македонски емигранти им порачува дека ќе се зголеми вкупното гласачко тело и ќе се намалат шансите за цензус, иако од Владата на РМ веќе потврдија дека на консултативното изјаснување не мора да има 50 отсто плус еден излезност.
– Апел до македонските државјани во странство: пријавувајте се дека ќе гласате на референдум, а потоа – вие си знаете Но, многу е важно да ја најавите намерата да гласате во нашите дипломатско-конзуларни претставништва – само така ќе се борите во групата на оние кои бојкотирале. Звучи, глупаво и нелогично, ама така бара законот – напиша Ванковска.
Засега бројките не одат во прилог на интересот на професорката, бидејќи како што соопшти ДИК, во дипломатско-конзуларните претставништва на Република Македонија во странство се доставени вкупно 251 пријава од граѓани за гласање, сите преку веб апликацијата.
Најголем број пријави се поднесени за гласање во Берн и Виена – по 21, во Љубљана и Торонто по 18, Канбера 15.. Од пријавите, 127 се прифатени, а 124 се во обработка, информираат од ДИК.
Од ДИК укажуваат дека доколку некој од иселенците се пријави за изјаснување во дипломатско конзуларно претставништво во странство тогаш нема да може да гласа во Македонија доколку допатува во земјата.